మనసుకు హత్తుకుపోయే కబుర్లు

వాస్తు శాస్త్రం వెబ్‌సైట్‌లో “ఈ కబుర్లు” అనే ప్రస్తావన ఎందుకు ఉంటుంది? వీటిని చదవడం వల్ల మన సమాజానికి నిజంగా ఏమైనా ఉపయోగం ఉందా? ఇవి చదవడం ద్వారా మా సమయం వృథా అవుతుందా, లేక నా జీవితాన్ని మెరుగుపరుచుకుని ఒక ఉత్తమమైన, అద్భుతమైన భవిష్యత్తును నిర్మించుకునేందుకు సహాయపడతాయా? చదవండి మీకే అన్ని విషాయాలు తెలుస్తాయి.

భవిష్యత్తులో ఇటువంటి ఒక కాలం వస్తుందని బహుశా మనం ఊహించి ఉండం, ఏమి కాలమిది, ఏమి వైపరీత్యమిది, మనిషికి మనిషి తోనే పని లేకుండా పోతున్నది, ఎదురుగా మనిషి ఉన్నాడనే ధ్యాస నశించిపోతోంది, ఏమి సాధించడానికి ఈ ఆవిష్కరణలు, భారతీయులు ఎంత బలహీన మనస్కులు అయిపోయారు, విదేశాలలో ఏ కొత్తది ఆవిష్కరణ జరిగినా, వెనకా ముందు చూడకుండా దానిని పాటించడమేనా, కొంచమైనా ఆలోచన చేసేది లేదా, మన సంప్రదాయాలు ఏమిటి, మన పద్ధతులు ఏమిటి, మన పరిమితులేమిటి, అనే ఆలోచన వద్హా, విదేశాలలో ఏది కొత్తగా ఆవిష్కరణ అయిందో వెంటనే దాన్ని పాటించడం, అదే జీవితం అనుకోవడం.

చిన్నపిల్లలను మనం వదిలించుకోవడానికి, ఫోన్ ఇస్తే వారు ఆడుకుంటారు అని వారిని బలిపశువులను చేస్తున్నాము. బయట చూస్తే ఎంతో మంది తల్లితండ్రులు తమ పిల్లలకు ఫోన్ ఇచ్చి, వారు ఇతర పనులు చేసుకోవడం మనం చూస్తున్నాము. దీని వల్ల భవిష్యత్తులో ఆ పిల్లలు ఎంత ఇబ్బందులను ఎదుర్కుంటారో మనం ఆలోచన చెయ్యం. వారి భవిష్యత్తు మనకు అవసరం లేదా ?, ఇక ఎవరికోసం బ్రతుకుతున్నాము.

ఈ తరం ఎదుర్కొంటున్న ప్రధాన సమస్య ఏమిటి అని ఎవరిని అడిగినా.. ఉద్యోగాల కొరత, పెరిగిపోతున్న పోటీ లేదా వేగంగా మారుతున్న జీవనశైలి గురించి చెబుతారు. ఇవన్నీ నిజమే అయినప్పటికీ, మన రోజువారీ జీవితంలో మరింత లోతైన ప్రభావం చూపుతున్న మరో అంశం ఉంది. అది బయటకి కనిపించదు, కానీ మన ఆలోచనలను, అలవాట్లను మారుస్తూ మనల్ని ఒక ప్రమాదకరమైన వ్యసనంలోకి నెట్టేస్తోంది. అదే డిజిటల్ వ్యసనం.

టెక్నాలజీ అనేది మనిషి సృష్టించుకున్న ఒక అద్భుతమైన సాధనం. సమస్య టెక్నాలజీతో లేదు, దాని వల్ల కలిగే ఆకర్షణలతోనే ఉంది. మనం ఫోన్‌ను వాడుతున్నామని అనుకుంటాం, కానీ మన సమయం, దృష్టి, మనశ్శాంతి ఆ ఫోన్ ప్రభావంలోకి జారిపోతున్నాయి. ఉదయం లేవగానే స్క్రీన్, రాత్రి పడుకునే ముందు స్క్రీన్.. ఈ అలవాటు మనల్ని మెల్లగా తన అదుపులోకి తీసుకుంటుంది.

లిఫ్ట్ కోసం వేచి ఉన్న ఆ ఒక్క నిమిషం కూడా ఫోన్ చూడకుండా ఉండలేకపోతున్నామంటే, మనం మన అదుపులో లేనట్లేనని అర్థం. మన మనసు మన మాట వినడం లేదనే విషయాన్ని ఎంత త్వరగా గుర్తిస్తే అంత మంచిది. ఇది గమనించకపోతే భవిష్యత్తులో మరిన్ని ఇబ్బందులు ఎదుర్కోవాల్సి వస్తుంది.

ప్రస్తుతం మనకు ప్రతిదీ క్షణాల్లో జరిగిపోవాలి. షార్ట్ వీడియోలు, రీల్స్ చూడటం వల్ల మన మెదడు తక్కువ సమయంలో ఎక్కువ వినోదాన్ని కోరుకుంటోంది. దీనివల్ల ఏదైనా ఒక పనిపై ఎక్కువ సేపు దృష్టి పెట్టడం కష్టమవుతోంది. కష్టపడి సాధించాల్సిన లక్ష్యాల పట్ల సహనం తగ్గిపోతోంది.

నేడు 10 నిమిషాల్లో డెలివరీ అనే కాన్సెప్ట్ రావచ్చు, రేపు అది 5 నిమిషాలకు తగ్గవచ్చు. దీనివల్ల మనకు సౌకర్యంగా అనిపించినా, మానసికంగా మనం ఎంతటి అసహనానికి గురవుతున్నామో ఆలోచించాలి. ఎదుటివారి విజయాలు చూసి అసూయ పడటం కంటే, వారు ఆ స్థాయికి చేరడానికి పడిన శ్రమను గుర్తించడం ముఖ్యం.

డిజిటల్ ప్రపంచంలో కనిపించే జీవితం తరచుగా ఎంపిక చేసిన క్షణాల సమాహారం మాత్రమే. అక్కడ అందరూ సంతోషంగా ఉన్నట్టే కనిపిస్తారు. అది చూసి మన సాధారణ జీవితాన్ని వారితో పోల్చుకుని బాధపడటం మొదలుపెడతాం. కానీ గుర్తుంచుకోండి, డిజిటల్ వేదికలపై కనిపించే రంగురంగుల జీవితాలు ఎప్పుడూ పూర్తిగా నిజమైనవి కావు. కష్టపడకుండా ఏదీ రాదు అనే నిజాన్ని మనం మర్చిపోకూడదు.

లోకంలో ఎక్కడో ఏదో జరుగుతోంది, అది నేను చూడకపోతే వెనుకబడిపోతానేమో అన్న భయం (Fear of Missing Out) మనల్ని నిరంతరం ఒత్తిడికి గురి చేస్తోంది. వేరొకరి అప్‌డేట్స్ చూస్తూ మనల్ని మనం తక్కువ చేసుకోవద్దు. ప్రతి ఒక్కరి ప్రయాణం వేరుగా ఉంటుంది. స్క్రీన్ మీద కనిపించేది మొత్తం కథ కాదు అనే అవగాహన పెంచుకోవాలి.

ఒకేసారి పది పనులు చేస్తున్నామని మనం మురిసిపోతుంటాం. కానీ మానవ మెదడు సహజంగా ఒక సమయంలో ఒక పనిపై మాత్రమే పూర్తి ఏకాగ్రత పెట్టగలదు. పదే పదే దృష్టి మారుస్తూ ఉంటే చేసే పనిలో నాణ్యత తగ్గుతుంది. మన పెద్దలు చెప్పినట్టు "రెండు గుర్రాల మీద స్వారీ చేయలేము". గమ్యం చేరాలంటే ఏకాగ్రత ఒక్క దానిపైనే ఉండాలి.

మన ఫోన్‌కి వచ్చే నోటిఫికేషన్లు, లైకులు, మెసేజ్‌లు మన మెదడులో 'డోపమైన్' అనే రసాయనాన్ని విడుదల చేసి తాత్కాలిక ఆనందాన్ని ఇస్తాయి. మెల్లగా మనం వీటికి బానిసలవుతాం. దీనివల్ల నిశ్శబ్దంగా కూర్చోవడం మనకు బోర్ కొడుతుంది. అనవసరమైన నోటిఫికేషన్లు మనల్ని లక్ష్యం వైపు కాకుండా గందరగోళం వైపు లాగుతాయి. అత్యవసరమైన ఆఫీస్ పనులు లేదా వ్యాపార విషయాలు తప్ప, మిగిలిన అనవసర విషయాల మీద ఏకాగ్రతను వ్యర్థం చేసుకోవద్దు. ఎవరి సంపాదన కోసమో మీ జీవితాన్ని నాశనం చేసుకోవద్దు.

అవసరానికి మించిన సమాచార ప్రవాహం మన మెదడును అలసటకు గురిచేస్తుంది. ఏది ముఖ్యం, ఏది కాదు అనే స్పష్టత కోల్పోతాం. అతిగా సమాచారాన్ని తలకెక్కించుకోవడం వల్ల అసలైన ఆలోచనలు మరుగున పడిపోతాయి. కొన్నిసార్లు తక్కువ సమాచారంతో ఉండటమే మన మనసుకి ప్రశాంతతను, స్పష్టతను ఇస్తుంది.

టెక్నాలజీని వదిలేయమని ఎవరూ చెప్పడం లేదు, దాన్ని మన అదుపులో ఉంచుకోవాలని మాత్రమే చెబుతున్నాం. ఒకప్పుడు మనకు కనీసం 50 ఫోన్ నంబర్లు గుర్తుండేవి. కానీ ఇప్పుడు మన సన్నిహితుల నంబర్లు కూడా గుర్తుంచుకోలేకపోతున్నాం. అంటే మన జ్ఞాపకశక్తిని టెక్నాలజీకి తాకట్టు పెడుతున్నాం.

పని వేళల్లో ఫోన్‌ను పక్కన పెట్టండి. నిద్రకు కనీసం గంట ముందు డిజిటల్ విరామం తీసుకోండి. ఫోన్ మాట్లాడటానికి మాత్రమే వాడండి. సాధ్యమైతే మీ ఫోన్‌ను మీకు ఓ 6 అడుగుల దూరంలో ఉంచండి. ఈ చిన్న మార్పులు మీ జీవితంలో పెద్ద మార్పుకు దారితీస్తాయి.

టెక్నాలజీ మన జీవితాన్ని సులభతరం చేయాలి తప్ప, అది మనల్ని శాసించకూడదు. ఈ కాలంలో తెలివైన వారి కంటే, ఎక్కువ ఏకాగ్రత (Focus) ఉన్నవారే విజేతలుగా నిలుస్తారు. అతిగా ఫోన్ వాడితే అద్భుతమైన ఆలోచనలు చేసే శక్తిని కోల్పోతాం. మేల్కోకపోతే భవిష్యత్తులో శారీరకంగా, మానసికంగా బలహీనపడిపోతాం.

ప్రతిరోజూ మనల్ని మనం ఒకసారి ప్రశ్నించుకోవాలి: "ఈరోజు నేను నా ఫోన్‌ను ఎంతసేపు ఉపయోగించాను? అది నన్ను ఎంతసేపు తనలో నిమగ్నం చేసింది?" ఈ ప్రశ్నకు మీరు ఇచ్చే నిజాయితీ గల సమాధానమే మీ జాగ్రత్త జీవనానికి ఆరంభం అవుతుంది.

మీకు ఆత్మవిశ్వాసం ఉంటే ఈ ఛాలెంజ్‌ను స్వీకరించండి: "ప్రతిరోజూ ఉదయం 9 గంటల వరకు మొబైల్ ఫోన్‌ను తాకకుండా ఉండగలరా?" ఒకవేళ మీరు దీన్ని సాధించగలిగితే, మీ వివరాలను మాకు ఈమెయిల్ చేయండి. ఒక్క రూపాయి ఖర్చు లేకుండా మీ ఫోటోతో సహా మీ అనుభవాన్ని మా వెబ్‌సైట్‌లో ప్రచురిస్తాము. మీ విజయం ఇతరులకు స్ఫూర్తినిస్తుంది. మీరు ఇతరుల అభివృద్ధిని కోరుకుంటే, భగవంతుడు మీ అభివృద్ధిని కోరుకుంటాడు.