మనసుకు హత్తుకుపోయే కబుర్లు
వాస్తు శాస్త్రం వెబ్సైట్లో “ఈ కబుర్లు” అనే ప్రస్తావన ఎందుకు ఉంటుంది? వీటిని చదవడం వల్ల మన సమాజానికి నిజంగా ఏమైనా ఉపయోగం ఉందా? ఇవి చదవడం ద్వారా మా సమయం వృథా అవుతుందా, లేక నా జీవితాన్ని మెరుగుపరుచుకుని ఒక ఉత్తమమైన, అద్భుతమైన భవిష్యత్తును నిర్మించుకునేందుకు సహాయపడతాయా? చదవండి మీకే అన్ని విషాయాలు తెలుస్తాయి.
మనిషి బ్రతికే ఉన్నాడు, మనసు చనిపోయింది
భవిష్యత్తులో ఇటువంటి ఒక కాలం వస్తుందని బహుశా మనం ఊహించి ఉండం, ఏమి కాలమిది, ఏమి వైపరీత్యమిది, మనిషికి మనిషి తోనే పని లేకుండా పోతున్నది, ఎదురుగా మనిషి ఉన్నాడనే ధ్యాస నశించిపోతోంది, ఏమి సాధించడానికి ఈ ఆవిష్కరణలు, భారతీయులు ఎంత బలహీన మనస్కులు అయిపోయారు, విదేశాలలో ఏ కొత్తది ఆవిష్కరణ జరిగినా, వెనకా ముందు చూడకుండా దానిని పాటించడమేనా, కొంచమైనా ఆలోచన చేసేది లేదా, మన సంప్రదాయాలు ఏమిటి, మన పద్ధతులు ఏమిటి, మన పరిమితులేమిటి, అనే ఆలోచన వద్హా, విదేశాలలో ఏది కొత్తగా ఆవిష్కరణ అయిందో వెంటనే దాన్ని పాటించడం, అదే జీవితం అనుకోవడం.చిన్నపిల్లలను మనం వదిలించుకోవడానికి, ఫోన్ ఇస్తే వారు ఆడుకుంటారు అని వారిని బలిపశువులను చేస్తున్నాము. బయట చూస్తే ఎంతో మంది తల్లితండ్రులు తమ పిల్లలకు ఫోన్ ఇచ్చి, వారు ఇతర పనులు చేసుకోవడం మనం చూస్తున్నాము. దీని వల్ల భవిష్యత్తులో ఆ పిల్లలు ఎంత ఇబ్బందులను ఎదుర్కుంటారో మనం ఆలోచన చెయ్యం. వారి భవిష్యత్తు మనకు అవసరం లేదా ?, ఇక ఎవరికోసం బ్రతుకుతున్నాము.
నేటి తరం ఎదుర్కొంటున్న అసలైన సవాలు ఏమిటి?
ఈ తరం ఎదుర్కొంటున్న ప్రధాన సమస్య ఏమిటి అని ఎవరిని అడిగినా.. ఉద్యోగాల కొరత, పెరిగిపోతున్న పోటీ లేదా వేగంగా మారుతున్న జీవనశైలి గురించి చెబుతారు. ఇవన్నీ నిజమే అయినప్పటికీ, మన రోజువారీ జీవితంలో మరింత లోతైన ప్రభావం చూపుతున్న మరో అంశం ఉంది. అది బయటకి కనిపించదు, కానీ మన ఆలోచనలను, అలవాట్లను మారుస్తూ మనల్ని ఒక ప్రమాదకరమైన వ్యసనంలోకి నెట్టేస్తోంది. అదే డిజిటల్ వ్యసనం.
అసలు ముప్పు టెక్నాలజీ కాదు - ఆకర్షణలే!
టెక్నాలజీ అనేది మనిషి సృష్టించుకున్న ఒక అద్భుతమైన సాధనం. సమస్య టెక్నాలజీతో లేదు, దాని వల్ల కలిగే ఆకర్షణలతోనే ఉంది. మనం ఫోన్ను వాడుతున్నామని అనుకుంటాం, కానీ మన సమయం, దృష్టి, మనశ్శాంతి ఆ ఫోన్ ప్రభావంలోకి జారిపోతున్నాయి. ఉదయం లేవగానే స్క్రీన్, రాత్రి పడుకునే ముందు స్క్రీన్.. ఈ అలవాటు మనల్ని మెల్లగా తన అదుపులోకి తీసుకుంటుంది.
లిఫ్ట్ కోసం వేచి ఉన్న ఆ ఒక్క నిమిషం కూడా ఫోన్ చూడకుండా ఉండలేకపోతున్నామంటే, మనం మన అదుపులో లేనట్లేనని అర్థం. మన మనసు మన మాట వినడం లేదనే విషయాన్ని ఎంత త్వరగా గుర్తిస్తే అంత మంచిది. ఇది గమనించకపోతే భవిష్యత్తులో మరిన్ని ఇబ్బందులు ఎదుర్కోవాల్సి వస్తుంది.
ఇన్స్టంట్ గ్రాటిఫికేషన్ - వెంటనే ఫలితం కోరే మనస్తత్వం
ప్రస్తుతం మనకు ప్రతిదీ క్షణాల్లో జరిగిపోవాలి. షార్ట్ వీడియోలు, రీల్స్ చూడటం వల్ల మన మెదడు తక్కువ సమయంలో ఎక్కువ వినోదాన్ని కోరుకుంటోంది. దీనివల్ల ఏదైనా ఒక పనిపై ఎక్కువ సేపు దృష్టి పెట్టడం కష్టమవుతోంది. కష్టపడి సాధించాల్సిన లక్ష్యాల పట్ల సహనం తగ్గిపోతోంది.
నేడు 10 నిమిషాల్లో డెలివరీ అనే కాన్సెప్ట్ రావచ్చు, రేపు అది 5 నిమిషాలకు తగ్గవచ్చు. దీనివల్ల మనకు సౌకర్యంగా అనిపించినా, మానసికంగా మనం ఎంతటి అసహనానికి గురవుతున్నామో ఆలోచించాలి. ఎదుటివారి విజయాలు చూసి అసూయ పడటం కంటే, వారు ఆ స్థాయికి చేరడానికి పడిన శ్రమను గుర్తించడం ముఖ్యం.
సోషల్ మీడియా: భ్రమ vs వాస్తవం
డిజిటల్ ప్రపంచంలో కనిపించే జీవితం తరచుగా ఎంపిక చేసిన క్షణాల సమాహారం మాత్రమే. అక్కడ అందరూ సంతోషంగా ఉన్నట్టే కనిపిస్తారు. అది చూసి మన సాధారణ జీవితాన్ని వారితో పోల్చుకుని బాధపడటం మొదలుపెడతాం. కానీ గుర్తుంచుకోండి, డిజిటల్ వేదికలపై కనిపించే రంగురంగుల జీవితాలు ఎప్పుడూ పూర్తిగా నిజమైనవి కావు. కష్టపడకుండా ఏదీ రాదు అనే నిజాన్ని మనం మర్చిపోకూడదు.
FOMO - ఏదో కోల్పోతున్నామనే భయం
లోకంలో ఎక్కడో ఏదో జరుగుతోంది, అది నేను చూడకపోతే వెనుకబడిపోతానేమో అన్న భయం (Fear of Missing Out) మనల్ని నిరంతరం ఒత్తిడికి గురి చేస్తోంది. వేరొకరి అప్డేట్స్ చూస్తూ మనల్ని మనం తక్కువ చేసుకోవద్దు. ప్రతి ఒక్కరి ప్రయాణం వేరుగా ఉంటుంది. స్క్రీన్ మీద కనిపించేది మొత్తం కథ కాదు అనే అవగాహన పెంచుకోవాలి.
మల్టీటాస్కింగ్ - సామర్థ్యమా లేక భ్రమనా?
ఒకేసారి పది పనులు చేస్తున్నామని మనం మురిసిపోతుంటాం. కానీ మానవ మెదడు సహజంగా ఒక సమయంలో ఒక పనిపై మాత్రమే పూర్తి ఏకాగ్రత పెట్టగలదు. పదే పదే దృష్టి మారుస్తూ ఉంటే చేసే పనిలో నాణ్యత తగ్గుతుంది. మన పెద్దలు చెప్పినట్టు "రెండు గుర్రాల మీద స్వారీ చేయలేము". గమ్యం చేరాలంటే ఏకాగ్రత ఒక్క దానిపైనే ఉండాలి.
డోపమైన్ ప్రభావం - లైక్స్ వెనుక పరుగు
మన ఫోన్కి వచ్చే నోటిఫికేషన్లు, లైకులు, మెసేజ్లు మన మెదడులో 'డోపమైన్' అనే రసాయనాన్ని విడుదల చేసి తాత్కాలిక ఆనందాన్ని ఇస్తాయి. మెల్లగా మనం వీటికి బానిసలవుతాం. దీనివల్ల నిశ్శబ్దంగా కూర్చోవడం మనకు బోర్ కొడుతుంది. అనవసరమైన నోటిఫికేషన్లు మనల్ని లక్ష్యం వైపు కాకుండా గందరగోళం వైపు లాగుతాయి. అత్యవసరమైన ఆఫీస్ పనులు లేదా వ్యాపార విషయాలు తప్ప, మిగిలిన అనవసర విషయాల మీద ఏకాగ్రతను వ్యర్థం చేసుకోవద్దు. ఎవరి సంపాదన కోసమో మీ జీవితాన్ని నాశనం చేసుకోవద్దు.
ఇన్ఫర్మేషన్ ఓవర్లోడ్ - సమాచార గందరగోళం
అవసరానికి మించిన సమాచార ప్రవాహం మన మెదడును అలసటకు గురిచేస్తుంది. ఏది ముఖ్యం, ఏది కాదు అనే స్పష్టత కోల్పోతాం. అతిగా సమాచారాన్ని తలకెక్కించుకోవడం వల్ల అసలైన ఆలోచనలు మరుగున పడిపోతాయి. కొన్నిసార్లు తక్కువ సమాచారంతో ఉండటమే మన మనసుకి ప్రశాంతతను, స్పష్టతను ఇస్తుంది.
సమతుల్యతే అసలైన పరిష్కారం
టెక్నాలజీని వదిలేయమని ఎవరూ చెప్పడం లేదు, దాన్ని మన అదుపులో ఉంచుకోవాలని మాత్రమే చెబుతున్నాం. ఒకప్పుడు మనకు కనీసం 50 ఫోన్ నంబర్లు గుర్తుండేవి. కానీ ఇప్పుడు మన సన్నిహితుల నంబర్లు కూడా గుర్తుంచుకోలేకపోతున్నాం. అంటే మన జ్ఞాపకశక్తిని టెక్నాలజీకి తాకట్టు పెడుతున్నాం.
పని వేళల్లో ఫోన్ను పక్కన పెట్టండి. నిద్రకు కనీసం గంట ముందు డిజిటల్ విరామం తీసుకోండి. ఫోన్ మాట్లాడటానికి మాత్రమే వాడండి. సాధ్యమైతే మీ ఫోన్ను మీకు ఓ 6 అడుగుల దూరంలో ఉంచండి. ఈ చిన్న మార్పులు మీ జీవితంలో పెద్ద మార్పుకు దారితీస్తాయి.
టెక్నాలజీ కేవలం ఒక సహాయకుడు మాత్రమే
టెక్నాలజీ మన జీవితాన్ని సులభతరం చేయాలి తప్ప, అది మనల్ని శాసించకూడదు. ఈ కాలంలో తెలివైన వారి కంటే, ఎక్కువ ఏకాగ్రత (Focus) ఉన్నవారే విజేతలుగా నిలుస్తారు. అతిగా ఫోన్ వాడితే అద్భుతమైన ఆలోచనలు చేసే శక్తిని కోల్పోతాం. మేల్కోకపోతే భవిష్యత్తులో శారీరకంగా, మానసికంగా బలహీనపడిపోతాం.
మిమ్మల్ని మీరు ప్రశ్నించుకోండి
ప్రతిరోజూ మనల్ని మనం ఒకసారి ప్రశ్నించుకోవాలి: "ఈరోజు నేను నా ఫోన్ను ఎంతసేపు ఉపయోగించాను? అది నన్ను ఎంతసేపు తనలో నిమగ్నం చేసింది?" ఈ ప్రశ్నకు మీరు ఇచ్చే నిజాయితీ గల సమాధానమే మీ జాగ్రత్త జీవనానికి ఆరంభం అవుతుంది.
మీకొక ఛాలెంజ్!
మీకు ఆత్మవిశ్వాసం ఉంటే ఈ ఛాలెంజ్ను స్వీకరించండి: "ప్రతిరోజూ ఉదయం 9 గంటల వరకు మొబైల్ ఫోన్ను తాకకుండా ఉండగలరా?" ఒకవేళ మీరు దీన్ని సాధించగలిగితే, మీ వివరాలను మాకు ఈమెయిల్ చేయండి. ఒక్క రూపాయి ఖర్చు లేకుండా మీ ఫోటోతో సహా మీ అనుభవాన్ని మా వెబ్సైట్లో ప్రచురిస్తాము. మీ విజయం ఇతరులకు స్ఫూర్తినిస్తుంది. మీరు ఇతరుల అభివృద్ధిని కోరుకుంటే, భగవంతుడు మీ అభివృద్ధిని కోరుకుంటాడు.
ఇక్కడ మీ ప్రశ్నలకు సమాధానములు ఆశించవచ్చు
గౌరవనీయులైన గృహస్థులకు ఏమైనా ప్రశ్నలు ఉంటే ఈ లింక్ ద్వారా పంపవచ్చు. సంబోధన గౌరవప్రదంగా ఉంటే “5 నిమిషాల” నుండి “24 గంటల” లోపు మా ప్రత్యుత్తరాన్ని ఆశించవచ్చు. .
వాస్తు శాస్త్రం మానవులపై ఎలా తన ప్రభావమును చూపిస్తుందో తెలుసుకుందాం. ఒకే గృహం లో కొందరికి అద్భుతంగా జరుగుతుంది, మరొకరికి ఏమాత్రం బాగా జరగదు. ఇలా ఎందుకవుతున్నది అనే విషయం తెలుసుకుందాం. ఏ శాస్త్రమైననూ పరిశోధన చేయకపోతే కొత్త విషయాలు ఆవిష్కరణకు నోచుకోవు. ఉదాహరణకు, ఒకప్పుడు మనం వాడే వాహనాలు ఎలా ఉండేవి, ఇప్పుడు ఎలా ఉన్నాయి!, ఒకప్పుడు మన వారికి ఏదైనా విషయం తెలపాలనుకుంటే ఉత్తరాలు వ్రాసేవారము. ఇప్పుడు, క్షణాలలో విదేశాలలో వున్నవారికి కూడా వెంటనే విషయాన్ని తెలియచేస్తున్నాము. ఇదంతా పరిశోధన ఫలితాలే కదా. ప్రతి విషయంలో కూడా పరిశోధన జరగాలి, అలాగే వాస్తు శాస్త్రాన్ని కూడా పరిశీలించాలి, అధ్యయనం చేయాలి, అప్పుడే మాత్రమే కొత్త కొత్త విషయాలు లోతైన రహస్యాలు తెలుస్తాయి. కొత్త కోణాలు, కొత్త విషయాలు వెలుగులోకి వస్తుంటాయి.
దిశాత్మక దిక్సూచి (Directional Compass ) రీత్యా ఈశాన్యం దిక్కు 45° లకు ఉంటుంది. ఈ దిక్కు ఉత్తరం మరియూ తూర్పు దిశల మధ్యలో, కోణంలో ఉంటుంది. దీనినే ఈశాన్య మూల లేదా ఈశాన్య కోణం అని అంటారు. అన్ని దిక్కులలోనూ ఈ దిశ సున్నితత్వం కలిగినది మరియూ అత్యంత ప్రభావమంతమైనది. ఈశాన్య దిశ యొక్క ప్రభావములు గృహము యొక్క శాంతి పై ప్రభావం చూపును. ఈశాన్యం బాగా ఉంటే, గృహములో శాంతం ఉంటుంది. ఈశాన్య దిశలో దోషములు వున్నట్లైతే గృహములో అశాంతి ఉండవచ్చును.
ఈ చిత్రం నందు ఒక గృహమును చూపించడం జరిగినది. ఈ గృహమునకు తూర్పు వైపున రహదారి, మరియు ఉత్తరం వైపున రహదారి కలదు. ఇలాగ రెండు వైపులా రహదారులు ఉన్నప్పుడు దీనిని ఈశాన్య మూల గృహము అని చెప్పుకుంటాము. దీనిని ఆంగ్ల భాషలో NORTHEAST CORNER HOUSE అని చెప్పుకుంటాం. సాధారణంగా ఇటువంటి గృహాలు మంచి ఫలితాలను ఇస్తాయి. దీనిని దృష్టిలో పెట్టుకొని లే అవుట్లు వేసేవారు అధిక ధరకు వీటిని అమ్ముకుంటుంటారు. కొన్ని దేశాలలో, ఉదాహరణకు, ఉత్తర అమెరికా, 
ఉత్తర దిశ సున్నా డిగ్రీలు లేదా 360 డిగ్రీలకు ఉంటుంది (0° లేదా 360°). తూర్పు దిశ 90 డిగ్రీలకు (90°) ఉంటుంది. ఈ రెండిటికీ మధ్య 45 డిగ్రీలకు (45°) ఈశాన్యం ఉంటుంది. ప్రస్తుతం మీరు చూస్తున్నది ఈశాన్యం దిక్కుగా ఉన్న గృహము. ఈ చిత్రపటంలో ఒక గృహము ఈశాన్యం దిక్కుకు తిరిగి ఉన్నది. ఈ గృహము ముందర ఉన్న రహదారిని ఈశాన్య రహదారి అని అంటారు. అనగా ఈ గృహమునకు ఈ రహదారి ఈశాన్య రహదారి అవుతుంది. ఈశాన్యం మూలలో కట్టిన గృహము (Northeast corner House) వేరు, ఈశాన్యం దిక్కుకు తిరిగి ఉన్న గృహము (Northeast facing house) వేరు, ముందుగా ఈ విషయాన్ని మనము శ్రద్ధగా తెలుసుకోవాలి. ఈశాన్యము మూలలో కట్టిన గృహము సాధారణంగా ఊహించిన ఫలితాలను ఇవ్వవచ్చును. అదే ఈశాన్యము తిరిగిన గృహము అద్భుతమైన ఫలితాలను లేదా ఊహించిన ఫలితాలను ఇస్తుంది అని చెప్పలేము. ఈ విషయం తెలియక ఈశాన్య దిక్కుకు తిరిగిన గృహము అని, అధిక ధరలు పెట్టి గృహాలనుకొంటుంటారు. చివరికి ఇబ్బందులకు గురి అయ్యి, ఆనక వాస్తు శాస్త్రవేత్తల దగ్గరకు వస్తుంటారు. ఈశాన్యం దిక్కుకు నిర్మితమైన గృహాల విషయంలో ప్రజలు అత్యంత జాగ్రత్తలు తీసుకోవాలి, ఏ చిన్న పొరపాటైననూ అనేక విధాలైనటువంటి సమస్యలను సృష్టిస్తుంది.
ప్రతి ఒక్కరికి అర్థం అయ్యే రీతిలో ఈశాన్య మూల ఎక్కడ ఉందో తెలుపుతూ తయారుచేసిన ఈ చిత్రపటంలో ఉత్తరం అని తెలిపిన ప్రదేశము నుంచి ఒక గీత, మరియు తూర్పు అని తెలిపిన ప్రదేశం నుంచి ఒక గీత, రెండూ ప్రయాణం అవుతూ ఒక మూలభాగంలో కలుస్తాయి. ఈ మూలభాగమునే ఈశాన్యం మూల అని అంటారు. వాస్తు శాస్త్రంలో ఈశాన్య మూలకు లేదా ఈశాన్య భాగమునకు ఒక ప్రశస్తమైన, ప్రభావవంతమైన, విశిష్టమైన, అద్భుతమైన స్థానం ఉన్నది. ఈశాన్యం చెడితే సమస్తము చేసినట్లే అని పెద్దలు చెబుతూ ఉంటారు. గృహస్థుల యొక్క అభివృద్ధికి గృహస్తుల యొక్క ప్రశాంతతకు ఈశాన్య భాగము ఒక కీలక ఘట్టమును పోషిస్తుంది. దానిని దృష్టిలో ఉంచుకొని ఈ రెండు గీతలు కలిసిన ప్రదేశం లో నక్షత్ర ఆకారంలో కొన్ని ప్రత్యక్షమవుతూ ఉంటాయి, అనగా ఈ ప్రాంతము చాలా ప్రత్యేకమైనది మరియు చాలా ముఖ్యమైనది అని తెలుపుట కొరకు ఈ ఏర్పాటు చేయడం జరిగినది.
1. మీరు నమ్మాల్సిన అవసరం లేదు, అయితే ఒక విషయం మీకు తెలియడంవలన ప్రయోజనం ఉండవచ్చునేమోనని ఇక్కడ తెలపడం జరిగినది. మధు అనే వ్యక్తి , ఉత్తర అమెరికాలోని 
దయచేసి ఒక్కసారి ఇదే గృహాన్ని పై భాగంలో చూపించడం జరిగింది ఒక్కసారి ఆ చిత్రపటం గమనించండి మరొకసారి ఈ చిత్రపటాన్ని గమనించండి. ఏ మార్పులు జరిగాయో గమనించాలంటే కొంచెం కష్టం. అయితే జాగ్రత్తగా చూసినట్లయితే ఏ మార్పు జరిగిందో తెలుస్తుంది. అమెరికా దేశంలో ఫ్లిప్ మోడల్, స్విచ్ మోడల్, మిర్రర్ ఇమేజ్, అనే పదాలు సర్వసాధారణం. ఇప్పుడు మీరు చూస్తున్న ఈ గృహం మధు గారి గృహం తర్వాత నాలుగో ఇల్లు. పేరు శివ. మధు గారు మరియు శివ గారి కుటుంబీకులు మామూలుగా కలవడం జరుగుతుంది, ఇరువురి పిల్లలు బాగా సాన్నిహిత్యం పెంచుకొని ఒకరంటే ఒకరు విడవలేని స్థితికి వచ్చారు. శివ గారు తన గృహం లో బ్రహ్మాండమైన సంతోషాన్ని చూస్తున్నారు, జీవితం బాగా కులాసాగా గడిచిపోతున్నది. మరి మధు గారి గృహానికి ఏమైంది?, ఇంతకీ దోషం ఎక్కడుంది. అసలు కిటుకు అర్థం కావాలంటే కష్టం, అయితే మీరు రెండు చిత్రపటాలను పదే పదే, పదేపదే, చూస్తే మీకు అర్థమవుతుంది ఒక చిన్న పొరపాటు జీవితాన్ని అతలాకుతలం చేసింది.
ఇప్పుడు మీరు చూస్తున్న చిత్రంలోని ఈశాన్య దిక్కుకు నిర్మితమైన ఈ గృహంలో అద్భుతమైన ఫలితాలు వస్తాయి అనడం సమంజసం కాకపోవచ్చును. ఇటువంటి గృహాలు మంచి కన్నా చెడు ఫలితాలే ఎక్కువగా ఇవ్వవచ్చు. ఒకవేళ మంచిఫలితాలు వస్తే, ఇంటి లోపల ఈశాన్య, నైరుతి కొలతలు గల పొడవాటి గదులు ఉండవచ్చును. ఈశాన్య దిక్కుకు గృహము నిర్మిస్తున్నారు అని తెలిసిన తర్వాత భోజనం చేసే వాళ్ళు కూడా మధ్యలో లెగసి ఇంటిని కొనేందుకు లగేత్తే వారు కోకొల్లులు. ఇక వెనుకా ముందూ ఆలోచన చేయరు, ఈశాన్య దిక్కు అని తెలిస్తే చాలు వెనకంజ వేయక, వెంటనే వెళ్లి అడ్వాన్స్ చెక్కులు ఇచ్చి ఆ స్థలాలను లేదా గృహాలను రిజర్వ్ చేసుకునేవాళ్లు ఉత్తర అమెరికాలో వేలల్లో ఉన్నారు, ఇది వాస్తవము. గృహం చేరిన తర్వాత వచ్చే చెడు ఫలితాలను నిర్మూలించే దానికి మరియు మంచి ఫలితాలను పొందేందుకు వాస్తు శాస్త్రవేత్తల కోసం తాపత్రయపడేవారు చాలామంది ఉన్నారు. అంతే కాకుండా వాస్తు ఏమాత్రం పనిచేయదని, తమ జాతకాలు ఇంతేనని, తాము దురదృష్టవంతులు అని, అమెరికాలో భారతీయ వాస్తు పనిచేయదని, వాస్తు పుస్తకాలలో అనవసరంగా ఈశాన్య వాస్తు గురించి హైప్ చేశారని (అతిగా వివరించారని), ఈశాన్యమంతా ఒక డొల్ల అని, తాము పొరపాటు పడ్డామని, ఇలా అనుకునేవారు పదుల సంఖ్యలో కాదు వందలలో ఉన్నారు. తాము చేసిన పొరపాటును మాత్రం ఒప్పుకోరు. అహం అడ్డు వస్తుంది.
ఇప్పుడు మీరు చూస్తున్న చిత్రంలోని ఈశాన్య దిక్కుకు నిర్మితమైన ఈ గృహంలో ఊహించిన ఫలితాలను పొందే అవకాశం అధికంగా ఉన్నది. ఈశాన్య దిక్కుకు నిర్మితమైన గృహాన్ని కొంటే చాలా మంచిదని తలచే వారికి ఇటువంటి గృహము మంచి ఫలితాలను ఇచ్చే అవకాశం అధికము. సాధారణంగా ఇటువంటి గృహాలు చెడు ఫలితాలను ఇవ్వవు. అయితే ఒక్క విషయం గమనించండి, ఇటువంటి గృహము లోపల మాస్టర్ బెడ్ రూమ్ లో వాయవ్య ఆగ్నేయ కొలతలు అధికంగా ఉండకూడదు, అంతేకాకుండా ఫ్యామిలీ రూమ్ కూడా ఆగ్నేయ వాయవ్య కొలతలు అధికంగా ఉండకూడదు. ఒకవేళ ఇటువంటి కొలతలు కలిగిన మాస్టర్ బెడ్ రూమ్ మరియు ఫ్యామిలీ రూమ్ ఉన్నప్పుడు, గృహస్తులు ఊహించిన మంచి ఫలితాలు రావడం కష్టమే. ఒకవేళ మీరు తీసుకునే గృహానికి మాస్టర్ బెడ్ రూమ్ మరియు ఫ్యామిలీ రూము, ఈశాన్యం నైరుతి కొలతల కన్నా, వాయవ్య ఆగ్నేయ కొలతలు అధికంగా ఉన్నట్లయితే, దయచేసి బాగా అనుభవం ఉన్న ఒక వాస్తు శాస్త్రవేత్త ద్వారా మాత్రమే తగిన నిర్ణయాన్ని తీసుకోండి, తొందరపాటు నిర్ణయాల వల్ల భవిష్యత్తులో చాలా ఇబ్బందులను ఎదుర్కోవలసి వస్తుంది.
ప్రస్తుతం మీరు చూస్తున్నది, ఈశాన్యం మూల గృహము. ఈ గృహములకు కూడా ఉత్తరం రోడ్డు మరియు తూర్పు రోడ్డు కలవు. అయితే ఈ రెండు రహదారులు కోణంగా కలవక, అర్థ చంద్రాకారంలో కలుస్తూ స్థలానికి ఈశాన్యంలో కోత పెడుతున్నాయి. ఈ విషయంగా ఎంతోమంది వాస్తు శాస్త్రవేత్తలు అనేక రకాలైనటువంటి తమ అభిప్రాయాలను తెలుపుతూ వచ్చారు. ఎప్పటికైనా లాజిక్ అనేది అతి ముఖ్యము, ప్రాముఖ్యము. అత్యంత ముఖ్యమైన విషయము తెలియజేస్తున్నాము జాగ్రత్తగా చదవండి. ఇటువంటి స్థలములలో గ్రహములు నిర్మించుకున్నప్పుడు ప్రహరీ గోడ ( దయచేసి మరొకసారి చదువుకోండి ) ఉన్నప్పుడు ఫలితాలు ఒక విధంగా, ప్రహరీ గోడ లేనప్పుడు ఇంకొ విధంగా ఫలితాలు ఉంటాయి. సాధారణంగా విదేశాలలో ముఖ్యంగా అమెరికా లాంటి దేశంలో ఇటువంటి గృహాలకు పూర్తి ప్రహరీ గోడ ఉండదు. అనగా 4 దిక్కులలో ప్రహరీ గోడ ఉండదు. ఇటువంటి పరిస్థితులలో చెడు ఫలితాలు రావడం చాలా అరుదు, ఒకవేళ ఇంటిలో ఏదైనా బలమైన వాస్తు దోషమున్నప్పుడు చెడు ఫలితాలు వస్తాయి, అంతేకానీ ఈశాన్య భాగంలో అర్ధచంద్రాకారంలో ఈశాన్యం కోతపడినదని భావించి కొందరు ఇటువంటి గృహాలను కొనాలా వద్దా అనే నిర్ణయం తీసుకోలేకపోతున్నారు.
ఇప్పుడు మీరు చూస్తున్న ఈశాన్య స్థలము పైన చెప్పుకున్న అర్థచంద్రాకారంలో కోతబడిన ఈశాన్య స్థలము కన్నా, ఇది ఉత్తమమైనది. ఉత్తరం రహదారి మరియు తూర్పు రహదారి, రెండూ కూడా ఈశాన్య కోణంలో కలుస్తున్నాయి, తద్వారా ఈ స్థలమునకు లేదా గృహమునకు ఈశాన్యము కోత పడలేదు, ఈశాన్య దోషం లేదు. ఇటువంటి స్థలములలో గృహం నిర్మించుకునే సమయంలో ప్రహరీ గోడ ఉన్నా, ప్రహరీ గోడ లేకపోయినా, పెద్ద మార్పులు ఏమీ ఉండవు, అవసరాన్ని బట్టి ప్రహరీ గోడను ఏర్పాటు చేసుకోండి, అవకాశం, అవసరం లేకపోతే ప్రహారి గోడ నిర్మించుకోవడాన్ని విరమించుకోండి. మామూలుగా ఇటువంటి గృహాలు, స్థలాలు గృహస్తులకు వ్యతిరేక ఫలితాలను ఇవ్వవు. జాతకం అద్భుతంగా ఉందని వచ్చే నెలలో పరీక్షలకు సరిగా చదవకపోతే ఫలితాలు ఎలా ఉంటాయో మీకు అందరికీ తెలుసు కదా!! అలాగే మనం తీసుకున్న స్థలం అద్భుతంగా ఉందని నిర్మాణం విషయంలో నిర్లక్ష్యం చేస్తే ఫలితాలు అనుకున్న రీతిలో రాకపోయి వాస్తు శాస్త్రం మీద మరియు వాస్తు శాస్త్రవేత్తల మీద అపనమ్మకం ఏర్పడే అవకాశం ఉంది. తదుపరి తమరి ఇచ్ఛ మరియూ దైవేచ్ఛ.
ఎంతోమంది ఈశాన్యం గృహం అనగానే వెనుకా ముందూ చూడకుండా మంచి - చెడూ విచారించకుండా వెంటనే వెళ్లి స్థలానికి / గృహానికి అడ్వాన్స్ పేమెంట్ కట్టి ఆనక తీరిగ్గా విచారిస్తూవుంటారు. ఒక్కసారి చిన్న పొరపాటు చేస్తే అది దాదాపుగా రెండు తరాలను ముప్పు తిప్పులు పెట్టవచ్చు. ఈ స్థలము లేదా గృహం కూడా ఈశాన్య మూల ఇంటి గానే పరిగణిస్తారు. అయితే ఈ గృహమునకు వాయవ్యము మరియు ఆగ్నేయము పెరిగి ఉన్నాయి. తద్వారా గృహమునకు ఈశాన్యము కోత పడినట్లే కదా. మామూలుగా చూసినట్లయితే ఈశాన్యంలో ఏ కోత లేనట్లుగా కనిపిస్తుంది, ఎప్పుడైతే వాయవ్య ఆగ్నేయాలు పెరుగుతాయో దాని అర్థం ఈశాన్యము కోతపడినట్లు అనుకోవాలి (అంతే కాకుండా ఇంకో సమస్య కూడా వుంది లెండి). అలా అనుకోవడానికి మనసు ఒప్పుకోకపోతే, వాయవ్య, ఆగ్నేయాలు పెరిగిన గృహంగానే దీన్ని పరిగణించాలి. ఎక్కువగా వాదులాడుకోవడం వల్ల సమయం వ్యర్థమవుతుంది. తూర్పు రహదారి ముందుకు వెళుతూ వెళుతూ, అనగా ఉత్తరానికి వెళుతూనట్లు కనిపిస్తుంది, అయితే జాగ్రత్తగా గమనించినట్లయితే తూర్పు రహదారి వాయవ్యానికి వెళుతున్నట్టుగా స్పష్టంగా అర్థం అవుతుంది. అలాగే ఉత్తర రహదారి తూర్పు వైపునకు వెళుతున్నట్టుగా అనిపిస్తుంది. 
1. సింధూరి గారు దక్షిణ భారతీయులు, చాలా గౌరవప్రదమైన కుటుంబానికి చెందినవారు. 2009వ సంవత్సరంలో అమెరికాకు వెళ్లి అక్కడనే స్థిర నివాసం ఏర్పరచుకున్నారు. 2011వ సంవత్సరం లాస్ ఏంజెల్స్ లో ఒక నూతన గృహాన్ని కొన్నారు. వీరికి గ్రీన్ కార్డు కూడా ఉంది. ఆ తర్వాత కొన్ని కారణాలవల్ల 2016 సంవత్సరంలో Folsom city కి వెళ్లిపోయారు. ముందుగా ఒక కిరాయి గృహాన్ని తీసుకోవడం జరిగింది. 2017 జూన్ నెలలో ఒక గృహమును కొందామనే ఉద్దేశంతో, రకరకాలైన ఇళ్లను చూశారు. అప్పటికే వాస్తు గురించి ఒక అభిప్రాయం ఉండడంతో మంచి వాస్తు గలిగిన గృహాన్ని తీసుకోవాలని నిర్ణయించుకున్నారు. సింధూరి గారు ఏ విషయంలో కూడా రాజీపడరు, ఉత్తమ మనసు ఉన్న గృహిణి. 4 గృహాలను చూసి, అందులో ఒకటి తీసుకోవాలనే ఉద్ధేశ్యంతో, సరిగ్గా వాస్తు శాస్త్రవేత్తకి డబ్బు కట్టే పరిస్థితులలో ఉండగా, తన భర్త నాన్నగారికి (మామ గారు) విషయం తెలిసి తను కలగజేసుకొని, ఇండియాలో ఉచితంగా చూసే ఎంతోమంది నాకు తెలిసిన వాస్తు శాస్త్రవేత్తలు ఉన్నారు, వారికి చూపించి మీకు ఒక గంటలోపు నేను విషయం చెప్తానని, ఈ గృహాన్ని చివరికి ఫైనలైజ్ చేశారు.
ఈ చిత్రంలోని ఇల్లు కూడా ఈశాన్య గ్రహమే. ఈ ఇంటికి కూడా ఉత్తరం రహదారి మరియు తూర్పు రహదారి కలవు. అయితే ఈ గృహమునకు ఉత్తర వాయవ్యము బాగా పెరిగినది. తద్వారా గృహస్తులు అనేక సమస్యలను ఎదుర్కోవాల్సి రావచ్చు. ఇలాగా కోణంగా ఉత్తర వాయవ్యము పెరిగిన గృహాల నివాసితులు అనేక ఆర్థికపరమైన సమస్యలు ఎదుర్కోవాల్సివుంటుంది. మానసికక్షోభలు ఉండవచ్చు. ఒకవేళ ఇటువంటి ఇంటిలో ఎవరైనా ఉన్నట్లయితే దయచేసి వారు షేర్ మార్కెట్ లోకి వెళ్ళవద్దు. ఇటువంటి గృహాలలో ఉన్నవారికి షేర్ మార్కెట్ ఏమాత్రం కలిసి రాదు. అంతేకాకుండా ఇటువంటి ఇంట్లో నివసించే వారికి వ్యాపారాలు ఏ మాత్రం కలిసి రావు. వ్యాపారం బాగా జరుగుతున్నదని, దురాశ పడి అదనపు పెట్టుబడి పెట్టవద్దు. కొద్దిగా చెడు జరిగే అవకాశములు అధికం. అప్పులు విపరీతంగా పెరగవచ్చు. అయితే ఏదో ఒక రోజు సమస్యల నుంచి బయటపడతారు. ఎవరో ఒక రూపంలో కానీ, ఏదో ఒక రూపంలో కానీ వీరి సమస్య పరిష్కారం అయ్యేలా సహాయం చేస్తారు.
ఈ చిత్రంలో మీకు స్పష్టంగా తూర్పు ఆగ్నేయం పెరిగిన ఇంటిని చూడవచ్చు. మామూలుగా ఇటువంటి గృహాలు ఇంటిలో నివసించే వారికి కొన్ని రకాలైనటువంటి సమస్యలను సృష్టించవచ్చు. ఈ గృహంలో ఉండే వారి వృత్తిని బట్టి కూడా ఫలితాలలో కూడా కొన్ని మార్పులు సంభవించే అవకాశం ఉంది. ఉదాహరణకు ఇటువంటి గృహంలో ఒక రాజకీయ నాయకుడు ఉన్నాడు అనుకుందాము., అతని మీద అభాండాలు పడే అవకాశం ఉంది. లేదా అతనికి వచ్చే మంచి అవకాశాన్ని ఇతరులు లాక్కోవాలని శతధా ప్రయత్నం చేస్తుంటారు. అయితే ఈ గృహస్తులకు ఏదో ఒక రీతిలో విజయం లభించే అవకాశం అధికము. ఉదాహరణకు ఒక ఉద్యోగస్తుడు ఈ గృహంలో ఉన్నట్లయితే, అతనిపై లంచాలు తీసుకున్నాడనే అపవాదు వచ్చే అవకాశం ఉంది. సాధారణంగా ఇటువంటి గృహాల్లో చిన్నపాటి దొంగతనాలు కావడం, లేదా చిన్నపాటి అగ్నిప్రమాదాలు కావడం, లేదా చిన్నపాటి యాక్సిడెంట్ లాంటివి, జరిగే అవకాశం అయితే ఉంది. ఏ చెడు జరిగినా చిన్నగా అయ్యే అవకాశమే ఉంది, విపరీత స్థాయులలో ఏ నస్టాలు జరగవు. ఒకవేళ గృహములో వాస్తుకు వ్యతిరేకంగా బలమైన నిర్మాణం జరిగినట్లయితే, దోష ప్రభావాలు మరింత అధికం అయ్యే అవకాశం మెండు. జాగ్రత్తలు తీసుకోవడం వలన నివాసితులకే మంచిది.
ఈ గృహం కూడా ఈశాన్య మూల గృహమే. తూర్పు రహదారి ఉత్తరానికి సాగిపోతున్నది. ఉత్తర రహదారి మాత్రం తూర్పు రహదారి దగ్గర ఆగిపోతున్నది. ఇలాగ ఎన్నో కలయికలు వాస్తు శాస్త్రం లో ఉంటాయి. ఒక్క ఈశాన్య మూల గృహం అనగానే అన్ని గృహాలు ఒకేరీతిలో ఉంటాయి అని అనుకోకూడదు. ఈ గృహం అత్యుత్తమమైన ఈశాన్య గృహం కోవకు చెందినది కాదు. అలాగని చెడు ఫలితాలు ఇవ్వదు. మంచి ఫలితాలే ఇస్తుంది. 100 కు 100 మార్కులు రావడం వేరు, 100 కు 50 మార్కులు రావడం వేరు. ఇద్దరూ ఉతీర్ణులే, అయితే తేడా స్పష్టంగా కనిపిస్తున్నది కదా. అలాగే అన్ని ఈశాన్యం గృహాలు 100 కు 100 మార్కులు ఇవ్వవు. ఈ గృహమును జాగ్రత్తగా గమనించండి, తూర్పు ఆగ్నేయం నుండి ఒక రహదారి ఈ గృహమునకు తగులుతున్నది. దీని ఫలితాలు కూడా ఈ గృహమునకు వర్తిస్తాయి. ఈ వీధి పోటు వలన ఈ గృహస్థులకు కొన్ని ఇబ్బందులు వచ్చే అవకాశం ఉన్నది. ఈ సమస్యకు పరిష్కారం ఉన్నది. వీధి పోటు పడుతున్న ప్రదేశంలో బాగా చెట్లను పెంచుకోవటం, లేదా advertisement బోర్డు లను ఏర్పాటుచేసుకోవటం, carshed ను ఏర్పాటు చేసుకోవటం, ఇతరత్రా కొన్ని మార్గాల ద్వారా సమస్యల నుండి బయట పడవచ్చును. మొత్తంమీద, ఈ గృహస్థులు సమస్యలనుండి బయట పడతారు.
ఈ చిత్రపటమును జాగ్రత్తగా గమనించండి. ఇది కూడా ఈశాన్య మూల గృహమే. ఉత్తరం రహదారి తూర్పుకు సాగిపోయినది, మరియు తూర్పు రహదారి ఉత్తరమునకు సాగిపోయినది. సాధారణంగా ఇటువంటి గృహాలు చాలా మంచి ఫలితాలు ఇవ్వాలి. అయితే ఈ గృహమునకు ఆగ్నేయ భాగం నుంచి ఒక వీధి వచ్చి తగులుతున్నది, అనగా ఈ గృహమునకు ఆగ్నేయ వీధి పోటు కలదు. సాధారణంగా ఆగ్నేయ వీధి పోటు అనునది గృహస్థులకు పరిష్కారం కాని సమస్యలను సృష్టిస్తుంది. తద్వారా గృహస్తులు ఎల్లవేళలా ఆ సమస్యను పరిష్కారం చేయడం కోసం నానా యాగి పడుతుంటారు. దేవస్థానాల చుట్టూ తిరుగుతారు జ్యోతిష్యుల చుట్టూ తిరుగవచ్చు. ఇలాగ గృహస్తులు నానా తిప్పలు పడుతూ ఉంటారు. ఈ గృహమునకు ఆగ్నేయ వీధి పోటు ఉన్ననూ, అదృష్టవశాత్తు ఇది ఈశాన్యం మూల గృహము అయినందువల్ల ఆగ్నేయ వీధి పోటు ఫలితాలు బలమైన చెడును కలిగించకుండా ఈశాన్యం నిరోధిస్తుంది. అనగా ఈ గృహస్తులకు పరిష్కారం లభిస్తుంది. సమస్యలు అయితే వస్తాయి, కానీ పరిష్కారం కూడా లభిస్తుంది.
ఈ గృహానికి ఉత్తర వాయవ్య (NNW) వీధి పోటు ఉండటం వాస్తు శాస్త్రం ప్రకారం మిశ్రమ ప్రభావాలను కలిగించవచ్చు. ఉత్తర దిశ సాధారణంగా కుబేరుని దిశగా భావించబడుతుంది, ఇది ధనసంపత్తి, ఆర్థిక స్థిరత్వం, మరియు అభివృద్ధికి అనుకూలంగా ఉంటుంది. అయితే, ఈ గృహానికి ఉత్తరవాయవ్య వీధి పోటు ఉండటం వల్ల కొన్నిసార్లు ఆర్థిక నష్టం, నిర్ణయాల్లో తొందరపాటు, వ్యాపారాల్లో లాభనష్టాలు, మరియు స్థిరమైన అభివృద్ధి లోపించడం వంటి సమస్యలు ఎదురుకావచ్చు. ముఖ్యంగా, ఈ రకమైన వీధి పోటు గల ఇళ్లలో వ్యక్తిగత జీవితంలో స్థిరత లేకపోవడం, అనవసర ఖర్చులు పెరగడం, మరియు అవకాశాలు వచ్చినా వాటిని సద్వినియోగం చేసుకోలేకపోవడం వంటి పరిస్థితులు ఏర్పడే అవకాశం ఉంటుంది. ఇంకా ఇది కుటుంబ సభ్యుల ఆరోగ్యంపై ప్రభావం చూపవచ్చు . కొంతమంది గృహస్థులు మానసికంగా స్థిరంగా లేకపోవడం, అనవసర ఆందోళనలతో ఉండటం, లేదా ముఖ్యమైన నిర్ణయాలు తీసుకోవడంలో వెనుకబడటం వంటి సమస్యలు ఎదుర్కొనే అవకాశం ఉంది. అలాగే, ఇంటిలో శాంతి లోపించడం, కుటుంబ సభ్యుల మధ్య అనవసరమైన వివాదాలు కలుగడం, నిద్రలేమి సమస్యలు ఎక్కువగా ఉండడం, మరియు అనవసర భయాలు, అనిశ్చితి భావన పెరగడం వంటి పరిస్థితులు కూడా కనిపించవచ్చు.
ఈ గృహం ఈశాన్య గృహమా? కొన్ని సంఘటనలను ఇక్కడ తెలియ చెయ్యాల్సి ఉన్నది, అయితే కొన్ని ప్రత్యేక కారణాల వలన, కొందరి వివరాలను ఇవ్వలేకపోతున్నాము. భవిష్యత్తులో కొందరి అనుభవాలను ఇక్కడ పంచుకుందాం. ఈ గృహమునకు రెండువైపులా రహదారులు ఉన్నాయి. ఈశాన్య రహదారి, ఆగ్నేయ రహదారి. ఈశాన్యం వైపున ముఖద్వారం ఉంటే ఫలితాలు ఉత్తమంగా ఉంటాయి. సాధారణంగా, తూర్పు ముఖ గృహాలు చాలా శుభప్రదమైనవి, ఇది ఆరోగ్యం, బుద్ధి, మరియు విజయానికి సహాయపడుతుంది. ఒకవేళ ముఖద్వారం ఆగ్నేయం దిక్కుకు ఉంటే, కుటుంబంలో ఆగ్రహాన్ని, ఆర్థిక ఒడిదుడుకులను, మరియు అనవసరమైన ఖర్చులను పెంచే అవకాశం ఉంది, ఇంట్లో ఉండే వ్యక్తులకు మానసిక ఉత్కంఠ, నిర్ణయాలలో అస్పష్టత, మరియు ఆరోగ్య సమస్యలు తలెత్తే అవకాశం ఉంది. కొన్ని సందర్భాల్లో, కుటుంబ సభ్యుల మధ్య ఒప్పంద లోపం, చిన్న చిన్న సమస్యలు పెద్దవిగా మారడం, అలాగే అనవసరమైన తగాదాలు తలెత్తడం వంటి సమస్యలు చోటుచేసుకోవచ్చు. అయితే, ఇంటి నిర్మాణం మరియు స్థల నిర్మాణ పరంగా సరైన మార్పులు చేస్తే, ఈ సమస్యలను తగ్గించుకోవచ్చు.
ఈ గృహానికి వాయవ్య-ఈశాన్య రహదారులు కలవు. ఇది వాస్తు శాస్త్రం ప్రకారం మిశ్రమ ప్రభావాలను కలిగించగలదు. ముఖ్యంగా ఇటువంటి స్థలముల నందు, ద్వారం అత్యంత ప్రాముఖ్యత సంతరించుకుంటుంది. ముఖద్వారం విషయంలో గృహస్థులు అత్యంత జాగ్రత్తలు తీసుకోవాలి. ఎందుకంటే ముఖద్వారం ఇంటి శుభ-అశుభ ఫలితాలను ప్రభావితం చేయగల ముఖ్యమైన అంశం. ఈశాన్యం దిశ సాధారణంగా శుభప్రదమైనదిగా భావించబడుతుంది, ఎందుకంటే ఇది ఆరోగ్యం, ధనం, విజయం, మరియు ఆధ్యాత్మిక శక్తిని పెంపొందించే దిశ. వాయువ్య దిశ, ఇది కొన్ని సందర్భాల్లో మానసిక స్థిరత్వాన్ని, సంబంధాల్లో అనుమానాన్ని, మరియు ఆర్థిక అనిశ్చితిని ప్రభావితం చేసే అవకాశం ఉంటుంది. ఈశాన్యం శక్తిని పూర్తిగా ఉపయోగించుకోగలిగితే, గృహస్థులకు అదృష్టం, అభివృద్ధి మరియు ప్రశాంతత లభించవచ్చు. కానీ వాయువ్య లో ముఖద్వారం ఏర్పాటుచేసుకున్నట్లయితే వ్యతిరేక ప్రభావం చూపించే అవకాశం అధికంగా ఉంది. కొన్ని సందర్భాల్లో గృహస్తులు ఆర్థిక ఒడిదుడుకులు, మానసిక ఒత్తిడులు, మరియు కుటుంబ విభేదాలు అనుభవించే అవకాశం ఉంది. ఈ రకమైన గృహాల్లో గృహ ద్వారం స్థానం ఎంతో కీలకం. ఈశాన్యం వైపు ముఖద్వారం ఉంటే , ఇది మంచి ఫలితాలను అందించగలదు.
ఈ చిత్రం లోని నీలి రంగు గృహం, ఈశాన్య మూల (Northeast Corner) లో ఉంది. వాస్తు శాస్త్రం ప్రకారం ఈశాన్యం మూల గృహం అత్యంత శుభప్రదమైనది. ఈశాన్య మూల గృహాలు సాధారణంగా శుభఫలితాలను అందిస్తాయి. తూర్పు మరియు ఉత్తర రహదారులు కలిగి ఉండటం వాస్తు శాస్త్రం ప్రకారం మంచి లక్షణం. ఇది ఇంట్లో ఆరోగ్యకరమైన వాతావరణాన్ని, ఆర్థిక స్థిరత్వాన్ని మరియు కుటుంబ సభ్యుల మధ్య మంచి సంబంధాలను ప్రోత్సహించగలదు . ఈ మొత్తం స్థలాలలో ఒక్క గృహం మాత్రమే ఈశాన్య మూలలో నిర్మించబడింది , మిగిలిన అన్ని ప్లాట్లు / స్థలాలు ఖాళీగా ఉన్నాయి. ఈశాన్య గృహానికి దక్షిణం మరియు పడమర వైపు ఎక్కువ ఖాళీ స్థలం ఉండటం వాస్తు దృష్ట్యా ప్రతికూల ప్రభావాలు కలిగించవచ్చు. ఇది ఆర్థిక నష్టం, అనిశ్చితి, అనారోగ్యాలు, మరియు కుటుంబ సభ్యుల మధ్య ఒత్తిడిని పెంచే అవకాశం ఉంది. ఈ స్థలాన్ని కొనుగోలు చేయాలా వద్దా అనే నిర్ణయం తీసుకోవడం సులభం కాదు. ఈశాన్య మూలలో గృహం ఉండటం శుభప్రదమైనదే అయినా , దక్షిణం మరియు పడమర వైపు ఖాళీ స్థలం ఎక్కువగా ఉండడం వల్ల ప్రతికూలతలు లేకుండా ఉండేందుకు వాస్తు నిపుణుల సలహా తీసుకోవడం మంచిది. స్వంత నిర్ణయం భవిష్యత్తులో బలమైన ఇబ్బందులను కలిగించవచ్చును.
ఆగ్నేయ ముఖ ద్వారం ఉన్న ఈశాన్య గృహం. వాస్తు శాస్త్రం ప్రకారం మిశ్రమ ప్రభావాలను కలిగించగలదు. సాధారణంగా ఈశాన్యం దిశ ఇంటి నిర్మాణానికి అత్యంత శుభప్రదమైనదిగా భావించబడుతుంది, ఇది ఆరోగ్యం, ధనం, విజయం, మరియు శాంతిని ప్రోత్సహిస్తుంది. కానీ, ఆగ్నేయ ముఖద్వారం కలిగి ఉండటం వల్ల కొన్నిసార్లు బలమైన ప్రతికూల ప్రభావాలు కనిపించే అవకాశం ఉంటుంది. ఆగ్నేయం అగ్ని తత్వానికి సంబంధించినది , కాబట్టి, ఈ తలుపు కుటుంబ సభ్యుల ఆరోగ్య సమస్యలు, ఆర్థిక ఒడిదుడుకులు, మానసిక ఒత్తిడులు, మరియు కుటుంబంలో విభేదాలు, అశాంతి, అసౌకర్యాలు, కలిగించే అవకాశముంది. ఇంట్లో మహిళల ఆరోగ్యం ప్రభావితమయ్యే అవకాశముంది. ఈ రకమైన గృహాల్లో ఆకస్మిక ఖర్చులు అధికంగా ఉండటం, కుటుంబ సభ్యుల్లో అధిక ఆగ్రహ భావాలు పెరగడం, మరియు నిద్రలేమి సమస్యలు ఎదురయ్యే అవకాశం ఉంది. అయితే, ఇంటి అంతర్గత వాస్తు నిర్మాణం సరైన విధంగా ఉంటే, చెడు ప్రభావాలను కొంతవరకు నియంత్రించుకోవచ్చు. ఈశాన్య గృహానికి తగిన ముఖద్వారం ఉండేలా జాగ్రత్తలు తీసుకోవడం, ఇంటి నిర్మాణాన్ని సరైన రీతిలో ప్లాన్ చేయడం, మరియు వాస్తు నిపుణుల సూచనలు పాటించడం ద్వారా శుభప్రభావాలను పొందడం సాధ్యమవుతుంది.
ఈ ఇంటికి తూర్పు మరియు ఉత్తర రహదారులు కలవు. ఈ గృహం కూడా ఈశాన్య గృహమే. ఈ గృహమును మరియు రహదారులను చాలా జాగ్రత్తగా గమనించండి తూర్పు రోడ్డు ఉత్తరానికి సాగిపోయింది, ఉత్తరం రోడ్డు తూర్పు రోడ్డు దగ్గరకు వచ్చి ఆగిపోయింది. ఈ విషయాన్ని మీరు శ్రద్ధగా గమనించి మనసులో పెట్టుకోండి. ఇలాగా ఉత్తరం రోడ్డు ఆగిపోయి తూర్పు రోడ్డు ఉత్తరానికి సాగినప్పుడు మహాద్భుతమైన ఫలితాలైతే ఆశించవద్దు. ఈ గృహం మంచి ఫలితాలే ఇస్తుంది, కానీ అత్యంత విశేషమైన వాస్తు ప్రయోజనాలను ఆశించడం అనవసరం. మనం పరిసరాల వాస్తు గురించి మాట్లాడడం లేదు, కేవలము ఈ ఈశాన్యం ప్లాట్ / ఇల్లు గురించి మాత్రమే మాట్లాడుకుంటున్నాము. దయచేసి ఒక్క విషయం గమనించండి ప్రతి ఒక్క ఈశాన్యం మూలలో నిర్మించిన గృహాము అద్భుతమైన ఫలితాలు ఇస్తాయని లేదా ప్రతి ఒక్క ఈశాన్య మూల గృహం కూడా సమమైన ఫలితాలు ఇస్తాయని చాలామంది అపోహ పడుతుంటారు. ఈ లింక్ నందలి విషయాలు చదివిన తరువాత ఎన్నో అపోహలు తొలగిపోవచ్చు. మీకు ఏమైనా సందేహాలు ఉంటే, మమ్మల్ని సంప్రదించడానికి సంకోచించకండి.
ఈ ఇంటికి కూడా తూర్పు మరియు ఉత్తర రహదారులు కలవు. ఈ గృహం కూడా ఈశాన్య గృహమే. రహదారులను చాలా జాగ్రత్తగా గమనించండి ఉత్తరం రోడ్డు తూర్పుదిక్కుకు సాగిపోయింది. తూర్పు రోడ్డు ఉత్తర రహదారి దగ్గర ఆగిపోయింది. చాలా చిన్న మార్పు, అయితే, ఫలితాల విషయం లో తేడాలు గమనించవచ్చును. ఇలాగా ఉత్తరం రోడ్డు తూర్పుదిక్కుకు సాగిపోయి, తూర్పు రోడ్డు ఉత్తరం రోడ్డు దగ్గర ఆగిపోయినప్పుడు, ఫలితాలు బాగా ఉంటాయి. ఈ గృహం మంచి ఫలితాలే ఇస్తుంది, విశేషమైన వాస్తు ప్రయోజనాలను ఆశించవచ్చు, (ఈ దేశానికి ప్రధానమంత్రి కావాలి, లేదా రాష్ట్రపతి కావాలి అనే కోరికలైతే నెరవేరవు) మనం పరిసరాల వాస్తు గురించి మాట్లాడడం లేదు, కేవలము ఈ ఈశాన్యం ఇల్లు గురించి మాత్రమే మాట్లాడుకుంటున్నాము. చూశారుగా ఎంత చిన్న మార్పు, అయితే ఫలితాల విషయంలో స్పష్టంగా తేడాలు గమనిస్తున్నాము. వాస్తు శాస్త్రంలో అత్యంత చిన్న మార్పు కూడా ఫలితాల విషయంలో తారుమారు చేయవచ్చు. మాది కూడా ఈశాన్యం గృహమే అయితే మాకు మంచి ఫలితాలు రావడం లేదు అనేవారు కొందరు ఉంటారు, అటువంటి వారికి ఈ లింకులోని విషయాలు చూపిస్తే తమ గృహంలో తేడా ఎక్కడుందో తెలుసుకోగలరు.
దయచేసి ఒక్కసారి పైన కనబరిచిన రెండు చిత్రపటములను మరియు ఈ చిత్రపటంను ఒకటికి రెండుసార్లు గమనించండి. పై రెండు చిత్రపటంలోని ఈశాన్య గృహం కన్నా ఈ చిత్రపటంలో కనపరచిన ఈశాన్య గృహం మంచి ఫలితాలను ఇస్తుంది. ఈ చిత్రపటం నందు ఉత్తర రహదారి మరియు తూర్పు రహదారి రెండూ కూడా ముందుకు సాగిపోతున్నాయి. ఈ రెండు కలిసిన ప్రాంతమును ఈశాన్యము అంటారని మీకు తెలుసు కదా. చిత్రపటంలో ఈశాన్య గృహము చాలా స్పష్టంగా కనిపిస్తున్నది. ఇటువంటి ఈశాన్య గృహాలు వాస్తు శాస్త్రం ప్రకారం శుభప్రదమైన గృహాలుగా పరిగణింపబడతాయి. ఇటువండి నిలయాలు సాధారణంగా మంచి ఆరోగ్యాన్ని, ఆర్థిక స్థిరత్వాన్ని, విజయాన్ని, విద్యను, అభివృద్ధిని , ఆనందమును మరియు శాంతిని ప్రసాదిస్తాయి. ఇటువంటి గృహాలలో ముఖద్వారము ఉత్తమమైన దిశలో ఏర్పాటు చేసుకున్నట్లయితే గృహస్తుల జీవితాలు బాగా ప్రకాశిస్తాయి. ఈశాన్య దిశలో బోరువెల్, నీటి తొట్టెలు, పూజా గది లాంటి నిర్మాణాలు ఉంటే , ఇది ఇంటి శుభశక్తిని మరిం ఉన్నత స్థితికి చేరే దానికి అవకాశం అధికంగా ఉంటుంది.
ఈ చిత్రం లోని గృహం ఈశాన్య మూల (Northeast Corner) గృహం , ఇది వాస్తు శాస్త్రం ప్రకారం శుభప్రదమైన గృహంగా పరిగణించబడుతుంది. మీకు అవకాశం ఉన్నట్లయితే, దయచేసి ఒక్కసారి పైన చూపించిన మూడు చిత్రపటములను మరియూ ఈ చిత్రపటమును ఒకసారి గమనించండి. చిన్న చిన్న మార్పులు కానీ ఫలితాల విషయంలో కొన్ని తేడాలను మనము చూడవచ్చు. ఈ గృహమునకు తూర్పు రహదారి సాధారణమైన రీతిలో ఉత్తర రహదారిని దాటి ఉత్తరానికి వెళ్లినది, అయితే ఉత్తర రహదారి ఈ గృహమునకు ఈశాన్యమును పెంచుతూ తూర్పు రహదారిని దాటుతున్నది. తద్వారా గృహమునకు ఉత్తర ఈశాన్యం పెరిగినది. ఈ ఒక్కటి పెరగడం వల్ల ఆర్థిక అభివృద్ధి కలగడం, గృహంలో సంతోషం, దూర ప్రాంత ప్రయాణాలు, కాస్త ఖర్చులు అధికమైనను ప్రయోజనకారిగా ఉండడం, ఇంట ఆరోగ్యం బాగుండడం, స్త్రీలు సుఖపడడం లాంటి ఎన్నో ప్రయోజనకరమైన ఫలితాలు అందుతాయి. ఇంటికి ముఖద్వార స్థానం అత్యంత ముఖ్యమైనది. ముఖద్వారం తూర్పు ఈశాన్యం, లేదా ఉత్తర ఈశాన్యం దిశల్లో ఉంటే మంచి ఫలితాలను అందిస్తుంది. కానీ, తూర్పు ఆగ్నేయం లేదా ఉత్తర వాయవ్యంలో ముఖద్వారం ఉంటే ప్రతికూల ప్రభావం కనిపించవచ్చు.
దయచేసి తమరు ఏమీ అనుకోకుండా ఒక్కసారి పైన చూపించిన నాలుగు చిత్రపటములను గమనించి ఆ తర్వాత ఈ చిత్రపటం చూడండి. జాగ్రత్తగా చూసినట్లయితే తూర్పు రహదారి ఈ గృహమునకు తూర్పు ఈశాన్యం పెంచుతూ ఉత్తరానికి సాగిపోయినది. సాధారణంగా ఇటువంటి గృహాలు నివాసితులకు అద్భుతమైన ఫలితాలను ఇస్తాయి. తూర్పు ఈశాన్యం పెరిగినటువంటి స్థలములలో గృహమును వాస్తు శాస్త్ర రీత్యా నిర్మించినట్లయితే గృహస్తులు అద్భుతమైన ఫలితాలను పొందగలరు. పిల్లలకు విద్య బాగా వస్తుంది, కుటుంబ సభ్యుల ఆరోగ్యం బాగా ఉంటుంది, జీవితంలో స్థిరత్వం ఉంటుంది, సమాజంలో మంచి పేరు ప్రఖ్యాతులు కలిగి ఉంటారు, సంఘంలో వీరి మాట చెల్లుతుంది, ఆర్థిక అభివృద్ధి బాగా ఉంటుంది, ఇతరుల మీద, ఈ గృహ నివాసితులకు కొంచెం జాలి దయ అనేవి ఉంటాయి. దయచేసి గమనించండి, ముఖ ద్వారం ఏర్పాటు చేసిన ప్రదేశం అనేది అత్యంత ముఖ్యమైనది. ఒకవేళ ఇటువంటి గృహాలకు ముఖ ద్వారము వ్యతిరేక దిశలలో ఏర్పాటు చేసుకున్నట్లయితే మంచి ఫలితాలు బాగా తగ్గి, చెడు ఫలితాలు కూడా వచ్చే అవకాశం ఉంది.
ఈ గృహానికి తూర్పు మరియు ఉత్తర రహదారులు ఈశాన్యం వైపుగా విస్తరించడం (Extending Towards Northeast) వాస్తు శాస్త్రం ప్రకారం అత్యంత శుభప్రదమైన లక్షణం. ఈశాన్యం దిశ ఇంటికి ఆధ్యాత్మిక శక్తిని, ఆరోగ్యాన్ని, విద్యను, మరియు ఆర్థికాభివృద్ధిని అందించే శక్తివంతమైన స్థానం. ఈ రకమైన గృహ నిర్మాణం సాధారణంగా మంచి ఫలితాలను , ముఖ్యంగా కుటుంబ సభ్యులకు శాంతిని, అభివృద్ధిని అందిస్తుంది. ఈ రహదారి విస్తరణ వల్ల ఇంటిలో పాజిటివ్ ఎనర్జీ ఎక్కువగా చేరుతుంది, దీని ద్వారా గృహంలో నివసించే వారికి ఆలోచనా శక్తి ద్విగుణీ కృతం కావడం, మానసిక ప్రశాంతత, ఆరోగ్యంగా ఉండే అవకాశాలు పెరుగుతాయి, పిల్ల పాపలతో గృహం కళకళలాడుతుంది, ఇంట్లో ఆరోగ్యకరమైన వాతావరణాన్ని తీసుకురాగలదు, ఆర్థికంగా బలమైన స్థితిని అందించే అవకాశం ఉంటుంది, విదేశీ పర్యటనలు, దూరప్రాంత పర్యటనలు చేసే అవకాశం మెండుగా ఉన్నది. ఇలాంటి గృహాల్లో ఈశాన్యం వైపు ముఖద్వారం ఏర్పాటు చేస్తే, వాస్తు పరంగా ఇది మరింత శుభప్రదంగా మారుతుంది . అలాగే, ఈశాన్య మూలలో బోరువెల్, నీటి తొట్టెలు, లేదా పూజా గది ఏర్పాటుచేస్తే , ఇంటికి శుభశక్తిని పెంచే అవకాశాలు మెరుగవుతాయి.